မိန်းကလေးရယ်…
သံသရာကြွေးတွေက အတုံ့အလှည့်
တင်လာပြီထင်ပါရဲ့……
အကြောင်းကြောင်းများကြောင့် တွဲလက်တွေ
ဖြုတ်ကြပါစို့ မိန်းကလေးရယ်…
မိန်းကလေးရယ်…
အဲ့ဒီ့သမုဒယဆိုတဲ့
ပန်းကလေးတွေလည်း မဖူးပွင့်တော့ဘူးနော်
သူတို့လည်း ကံမဆိုင်ကြတဲ့ ဖူးစာတွေကို
ပစ်ပစ်ခါခါမုန်းတီးလိုက်ကြပြီထင်ပါရဲ့…
မိန်းကလေးရယ်…
ဟိုး…..တုန်းက ရယ်သံလေးတွေကို
ကြားနေပါသေးရဲ့ကွယ်…
တချိန်က ငါဆိုတဲ့ကဗျာဆရာတစ်ယောက်ကိုတော့
ဖြစ်နိုင်ရင် ဝေးဝေးမှာတင် မေ့ထားလိုက်ကွယ်…
မိန်းကလေးရယ်…
စံပါယ်ပွင့်ဖူး ရနံ့ကြူးတဲ့
ဆံနွယ်လေးတွေကို အတွေးထဲမှာတင်
နမ်းရှိုက်နေပါသေးတယ်…
နင်ကော ငါရွတ်ပြခဲ့တဲ့ ကဗျာလေးတွေကို
လွမ်းနေမိသေးလား မိန်းကလေးရယ်…
မိန်းကလေးရယ်…
ဘ၀ဆိုတာကြီးက ခက်တယ်
ငါတို့ရဲ့ အသိတွေကလည်း ခက်တယ်
အရိပ်ယောင်လေးလောက်တောင်
လိမ္မာမပြခဲ့တဲ့ နင်ကလည်းခက်တယ်
ဘာပဲဖြစ်ဖြစ်…ငါကလည်း
ခက်ခဲ့ပါရဲ့ကွယ်…
မိန်းကလေးရယ်…
သိပ်ပြီးတော့ မငိုနဲ့တော့နော်
ငါပြောခဲ့သလိုပါပဲ…
(အတတ်နိုင်ဆုံး ငါ့ကိုမေ့ပစ်လိုက်ပါ)
ဟိုတစ်ချိန်က အနက်ရောင် ကဗျာစာအုပ်လေး
ဟောဒီကမ္ဘာကနေ ပျောက်ကွယ်သွားတဲ့အထိပေါ့…ဟာ
အရာရာကို အားမနာစတမ်း စုတ်ဖြဲပစ်လိုက်ပါကွယ်…
မိန်းကလေးရယ်…
ဘာတွေကို ဒီလောက်များ
စိတ်စွဲလန်းခဲ့ရသလဲကွယ်…
နင်ခပ်ပါးပါးလေး စွဲလန်းခဲ့ဖူးတဲ့
ငါ့အတွက်ဘာမှ ထင်ထင်ရှားရှား
အမှတ်ရခြင်းမျိုးတွေ မဖန်တီးပေးပါနဲ့တော့ကွယ်
မိန်းကလေးရယ်…
ဒီအချိန်မှာ စွဲလန်းခြင်းပေါင်းများစွာနဲ့
ဒီကဗျာကိုငါရွတ်နေပါတယ်…ရေးနေပါတယ်
အရင်ကဘာဆိုဘာမှ မစွဲလန်းတတ်ခဲ့တဲ့ငါဟာ
ခုတော့…နင်ချန်ထားခဲ့တဲ့ ခြေရာတွေရယ်…
နင်မှီထိုင်ခဲ့ဖူးတဲ့ တံခါးတစ်ချပ်ရယ်…
ရူဘီစီးကရက်တွေရယ်…တစ်ခုပြီးတစ်ခုကို
ဆိုးရွားတောက်လောင်စွာ စွဲလန်းနေပါရဲ့ကွယ်…
မိန်းကလေးရယ်…
အရာရာကို စီးကရက်တစ်လိပ်လို
ဖွာထုတ်ပြီး အသစ်တစ်လိပ်ကောက်တပ်
အားလုံးအစကနေ ပြန်တောက်လောင်ခွင့်ရှိရင် ကောင်းမယ်နော်
ဘာပဲဖြစ်ဖြစ်…
အရာရာကို ကျေးဇူးတင်ပါရဲ့
မိန်းကလေးရယ်…
၉လိပ်မြောက်စီးကရက်ကို နင်းချိုးခဲ့တဲ့အတွက်ရော
ငါ့နှလုံးသားတံခါးကို ညင်ညင်သာသာနဲ့ ခေါက်ပြခဲ့တဲ့အတွက်ရော
အားလုံးကို ကျေးဇူးတင်ပါရဲ့ကွယ်
မိန်းကလေးရယ်…
ကံကြုံကြတဲ့အခါ သူစိမ်းမဟုတ်တဲ့
လမ်းတွေထက်မှာ ပြန်ဆုံကြတာပေါ့ကွယ်
အဲ့ဒီ့အခါကြရင် အပြုံးဟောင်းလေးတွေနဲ့ပဲ
ဆီးကြိုနှုတ်ဆက် ….နောက်တော့…….
မှုန်ရီဝိုးတ၀ါးလွမ်းမောခြင်းလေးတွေနဲ့ ပြန်လည်
ကျောခိုင်းကြတာပေါ့….
မိန်း…က…လေး…ရယ်
ရွှေကြယ်မိုး
(9:14 PM)
(15/1/2012)
shwekyalmoe@gmail.com
No comments:
Post a Comment
ခုလိုလာတာကျေးဇူးပါ