(၁)
ငါ အိပ်မက်တယ်
ကဗျာ …
တစ်ဦးတစ်ယောက်ရဲ့
ဂီတမှာ
နင်လှပစွာ ကနေတယ်
ကဗျာ …
နင်များ လှမ်းကာကြည့်လေမလားဆိုပြီး
ငါ့မှာ အိနြေ္ဒမရ
စွယ်တော်ရွက် အခြောက်တွေ
ကြွေကြွေပြနေရတယ်။
(၂)
ငါ ဆုတောင်းတယ်
ကဗျာ …
ခေါင်းပန်းလှန်ပြီး
ဖြတ်ကြရမယ့်မဲ
အချစ်မှာ သရေပွဲမရှိဘူး
ကဗျာ …
ဆုတောင်းဆိုတာက
ဆုမကောင်းခဲ့သူတွေအတွက်
မဟုတ်လား။
(၃)
ငါ စိုးရိမ်တယ်
ကဗျာ …
ရုပ်ဝတ္ထုဆန်ဆန်
လောကဓံကို နင်ကြိုဆိုဆက်ဆံမှာ
ငါစိုးရိမ်တယ်
ကဗျာ ..
အလှတရားကို
လိုသလို ထိုးအန်
အလျော်အစားမဆန်ချင်စမ်းပါနဲ့။
(၄)
ငါ အသက်ရှူကျပ်တယ်
ကဗျာ …
ငါ့ရင်ကိုခွဲ
အလင်းတွေကျဲပါ
ကဗျာ …
ပိုးစုန်းကြူးတစ်ကောင်ရဲ့
နောက်ဆုံးညဟာ
အလင်းတွေရမှ
လှမှာမဟုတ်လား။
(၅)
ငါသွားမယ်
ကဗျာ …
လမ်းခွဲခြင်းဖတ်စာမှာ
သတိရခြင်းစာမျက်နှာ များစွာပါတယ်
ကဗျာ …
ငါရေးတဲ့စာ
အခါခါဖတ်
နင်စာနာတတ်ပါတော့
ကဗျာ …
သက်ထွေး
အောက်တိုဘာ ၁၇ ၂၀၁၀ ည ၉း၅၁
No comments:
Post a Comment
ခုလိုလာတာကျေးဇူးပါ